POESIE IN DIALETTO GENOVESE : SEGRETTO PE ANDA' COMODI IN CAROSSA

ANTICHE POESIE LIGURI IN DIALETTO GENOVESE
Segretto pe andà comodi in carossa
Segreto per andare comodi in carrozza

Da Turin un Offiziale,
gran burlon de naturale,
o piggiò posto in vettua
pe andà a Zena de premua;
ma o restò mortificou
de trovase accompagnou
c'un Lombardo tanto grasso
ch'o tappava o posto e o passo,
o l'ansciava comme un can
con due pippe lunghe in man,
o giasciava piaxentin,
e o beveiva ogni pittin.
L'Offiziale, chi no poeiva
stà asettou ben com'o voeiva,
e che o ghe fava ghignon,
o trovò moddo e manea
de desfase do trippon:
o se mette a daghe in cea
e in ta pansa di pattoin,
o se storce, o se remescia
comme un chi agge e convulscioin...
Cose scià gh'à?....(ghe dixe in sprescia
o panson tiando zù e gronde...)
Ninte, grazie.... o ghe risponde.
Da lì a un po' se mette a tià
casci e pugni da stroppià...
E comm'aelo quest'affare?....
(Torna o dixe a-o Militare:)
Scià me veu forse ammassà?....
Ninte... grazie... no temei,
chè non ho ancon  tutto o mà
che fra poco me veddieì....
Bagatella! Staggo fresco
Aoa chi con 'sto magnesco!....
(Fra lè o disse...) Ma.... de grazia,
cose o l'è o mà che scià l'ha addosso?...
Ma cattivo.... o portiò a-o fosso....
L'atro giorno ho avuo a disgrazia,
(Tremmo ancon) d'ese addentou
da un can pomele arraggiou!....
Vaddo a Zena pe piggià
di gren bagni d'aegua sà,
che m'è staeto conseggiou....
Meschin mì... (disse affannou
quello, alloa:) Scià me perdonn-e,
ho bezeugno de chinà
pe parlà con de personn-e....
A carossa o fè fermà,
o chinò zù de sprescion....
E o scappò ch'o scappa ancon!